خليك طموح

 بوست منقول 

اوعى ترضى ببني آدم حاف ✋🙂

من اللقاءات التي لا تنسى في تعارف الجواز ده.. ان حد محترم جدا رشحني لواحده معيدة في كلية علوم.. وشكرلي فيها جدا جدا وقد ايه هي عاقلة ومتزنة واخلاقها لا غبار عليها..

فأنا تشجعت ورحت والفرق بيني وبينها سنة واحدة.. وقعدت معاها وهي شخصية مسيطرة جدا وجد فوق الوصف.. قالتلي انت دارس ايه وبتشتغل ايه احكيلي؟؟

قلتلها انا بشتغل مهندس كهربا .. وسكت.. ده الرد الطبيعي..

قالتلي وايه.. قلتلها بس.. هو المفروض يبقي فيه ايه معاها ..

قالتلي حياتك فين دراستك ما اخدتش ماستر ما بتدرسش حاجة تانيه.. ما بتسعاش انك تطور من نفسك.. مافيش اي حاجة بتحبها ونفسك توصلها..

حسيت انها قلبت جد اوي وقلت اروش ع البت شويا.. فقلتلها اه قولي كدا.. انا مهندس كهربا وبحب السباحة جدا.. بصتلي كدا وقالتلي وبتدخل مسابقات وكدا.. قلتلها لا انا مابعرفش اعوم اصلا.. انا بحب السباحة بس.. زي الناس اللي بيتفرجوا علي كورة كدا هما كلهم بيعرفوا يلعبوا يعني.. فضحكت، فأنا اتطمنت..

قالتلي طيب عندك اي نشاط مجتمعي.. مشترك في جمعيه خيرية.. نشاط انساني..

قلتلها امي واحنا صغيرين كانت بتعمل لنا مكرونة في العشا ناكلها ولما نسالها ناكل جنبها ايه.. تقولنا كلوها حاف..

قالتلي وايه اللي دخل ده في كلامنا.. قلتلها انا مهندس كهربا حاف.. حاف.. زي المكرونة بتاعة امي كدا.. لا نشاط مجتمعي ولا حتي بقرأ الجرايد..

قالتلي مستواك في الأنجليزي عامل ايه يا احمد واللغات.. قلتلها مقفل الفرنساوي والانجليزي جايب فيه 49.5 ثانوية عامة.. فقامت ضحكت تاني.. قالتلي اقصد معاك تويفل ايلتس.. بتعرف لغات تانية..

قلتلها لا بس انا كنت بشوف مسلسل فريندس من غير ترجمة..

وقعدنا شوية وروحنا.. وقلت ان البت انبهرت بردودي وضحكت كتير في القعدة وهتوافق.. 

وبعدين بعدها بفترة بكلم الراجل بقوله هي البت دي مفيش اخبار عنها.. قالي والله يا احمد قالت مش مرتاحة.. ضغطت عليه اعرف السبب..

قالي بتقول انك مش طموح ومش واخد الأمور بجد وانك بتقول علي نفسك انك بني ادم حاف.. وهي عايزه واحده مش حاف.. عايزه واحد بغموس.. بغموس يابني..